John ásamt markaskoraranum Cörlu Lee
John Andrews þjálfari Aftureldingar var í skýjunum eftir 1-0 sigur á Þór/KA fyrr í kvöld. Hann efndi sinn hluta veðmáls sem hann gerði við Jón Pál Pálmason þjálfara Fylkis og talaði íslensku í viðtali við Fótbolta.net eftir leikinn. Jón Páll hafði einmitt svarað á ensku fyrr í sumar.
„Þetta er frábært lið og við spiluðum mjög vel. Þór/KA spilaði mjög vel líka. Við skoruðum eftir eina mínútu og þá voru 89 mínútur eftir þar sem við sinntum bara varnarvinnu“.
„Við hefðum kannski viljað halda boltanum betur og skora eftir 89 mínútur. En við skoruðum eftir eina mínútu. Vel gert Afturelding.“
John var gríðarlega ánægður með stigin þrjú og vonast til að geta fylgt sigrinum eftir í þremur síðustu deildarleikjunum.
„Það var frábært að fá þrjú stig. Nú eru þrír leikir eftir. Stjarnan, Breiðablik og Þróttur og það á aldrei að segja aldrei.“
John stefnir á að hafa það huggulegt í kvöld með Jóni Páli félaga sínum.
„Kannski fáum við Jón Páll í Fylki okkur einn Guinness í kvöld. Bara setjast niður og slaka á."
Hægt er að horfa á allt viðtalið við John í sjónvarpinu hér að ofan.
