Werder Bremen átti ekki í stökustu vandræðum með Borussia Monchengladbach er liðin áttust við í Bremen í dag en heimamenn unnu sannfærandi 5-1 sigur.

Bremen skoraði þrjú mörk á fyrstu þrettán mínútum leiksins. Niclas Fullkrug skoraði fyrsta markið á 5. mínútu áður en Marvin Ducksch bætti við öðru þremur mínútum síðar. Fullkrug var síðan aftur á ferðinni á 13. mínútu og í þetta sinn eftir sendingu frá Ducksch.

Ekki hjálpaði það Gladbach á 37. mínútu er Ramy Bensebaini skilaði boltanum í eigið net.

Marcus Thuram reyndi að koma Gladbach aftur í leikinn á 63. mínútu með góðu marki en Mitchell Weiser slökkti í vonum Gladbach með fimmta marki Bremen tíu mínútum síðar.

Bremen er í 8. sæti með 12 stig en Gladbach er með jafnmörg stig í 9. sætinu.