Magnús Már Einarsson, þjálfari Aftureldingar, var eðli málsins samkvæmt í sjöunda himni eftir 3-0 sigur hans manna á Stjörnunni úr Garðabæ. Magnús minnist þó fallins vinar og segir sigurinn tileinkaðan honum Guðjóni Ármanni, sem var í meistaraflokksráði Aftureldingar, en hann lést á dögunum.
Lestu um leikinn: Afturelding 3 - 0 Stjarnan
Maggi hefur í viðtölum að undanförnu talað um að hann sé ánægður með liðið sitt og að það muni koma að því að strákarnir skori mörk, en fyrir leikinn í kvöld hafði Afturelding einungis skorað eitt mark í fyrstu fjórum leikjum sínum í Bestu-deildinni.
„Já algjörlega. Þetta var frábær leikur hjá strákunum og frábær tilfinning. Ég vil byrja á því að tileinka þennan sigur Guðjóni Ármanni sem var í meistaraflokksráði hjá okkur sem lést á dögunum. Og votta dýpstu samúðarkveðjur til fjölskyldu hans og vina. Þessi sigur er fyrir Gauja. Það eru sjálfboðaliðar eins og hann sem hafa hjálpað við að koma liðinu upp í Bestu-deildina. Hann vann frábært starf fyrir félagið og hans verður sárt saknað.“
„Mér fannst vera kraftur í strákunum í dag. Frammistaðan í síðasta leik, mér fannst hún allt í lagi þrátt fyrir að við höfum tapað 3-0. Mér fannst margt falla á móti okkur þar og það vantaði herslumun. Þetta er svolítið eins og tómatsósa. Þegar það byrjar smá að koma þá sprautast allt út úr henni. Það var þannig með mörkin hérna.“
Var eitthvað sem Magnús ræddi við strákana fyrir leik um að liðið gæti herjað á eða var þetta bara ykkar bolti?
„Við förum alltaf yfir andstæðingana en hugsum fyrst og fremst um sjálfa okkur. Svo förum við yfir helstu hættur andstæðinganna og mér fannst við loka á þær í dag og gera það vel. Að sama skapi nýta okkur einhverja veikleika.“
Viðtalið í heild sinni má sjá í spilaranum hér að ofan
