Það var leikið í sænska bikarnum í dag. Það er leikið í átta riðlum til að byrja með í bikarkeppninni í Svíþjóð og kemst efsta liðið í hverjum riðli áfram í átta-liða úrslit. Með leikjunum í dag lauk riðlakeppninni og átta-liða úrslitin eru framundan.
Í dag lék Kolbeinn Sigþórsson sinn fyrsta keppnisleik fyrir Gautaborg í Íslendingaslag gegn Norrköping.
Kolbeinn, sem gekk í raðir Gautaborg frá AIK fyrir nokkrum vikum síðan, kom inn á sem varamaður á 72. mínútu en þá var staðan 1-1. Þannig endaði leikurinn en bæði mörkin komu í fyrri hálfleik. Hjá Norrköping spilaði Ísak Bergmann Jóhannesson allan leikinn en Finnur Tómas Pálmason og Oliver Stefánsson voru allan tímann á bekknum.
Það var Norrköping sem vinnur riðilinn með sjö stig og fer áfram í næstu umferð, en Gautaborg er úr leik eftir að hafa hafnað í öðru sæti riðilsins með fimm stig.
Jón Guðni Fjóluson spilaði allan leikinn fyrir Hammarby í 3-2 sigri á AIK, en Hammarby skoraði sigurmarkið með tíu menn inn á vellinum. Hammarby vann sinn riðil með fullt hús stiga.
Norrköping, Häcken og Hammarby eru Íslendingaliðin sem komust áfram í átta-liða úrslit.
Athugasemdir