England: Malard allt í öllu í stórsigri Man Utd

Þetta er mikilvægur sigur fyrir Rauðu djöflana sem eru í fjórða sæti, með 18 stig eftir 9 fyrstu umferðir tímabilsins. Þær rúlluðu yfir Tottenham í leik þar sem Melvine Malard fór á kostum.

Malard skoraði tvennu og gaf eina stoðsendingu í 0-4 sigri, þar sem Tottenham var sterkari aðilinn í fyrri hálfleik en lenti undir gegn gangi leiksins. Man Utd tók svo völdin á vellinum eftir leikhléð og nýtti færin sín til hins ýtrasta.

Hin norska Sophie Roman Haug bjargaði þá stigi fyrir Liverpool er liðið fékk Bristol City í heimsókn. Liðin áttust við í þokkalega jöfnum leik, en Liverpool er í fimmta sæti eftir jafnteflið - þremur stigum eftir Man Utd.

Bristol nældi í sitt fimmta stig á deildartímabilinu og er í næstneðsta sæti.

Að lokum tapaði botnlið West Ham heimaleik gegn Everton, en Dagný Brynjarsdóttir fyrirliði Hamranna er í barneignarfríi.

Fyrr í dag vann Arsenal toppslaginn gegn Chelsea 4-1 áður en Maria Þórisdóttir lagði upp í 2-2 jafntefli Brighton gegn Leicester.

Arsenal 4 - 1 Chelsea

Brighton 2 - 2 Leicester

Liverpool 1 - 1 Bristol City

Tottenham 0 - 4 Man Utd

West Ham 0 - 1 Everton