Hörður Björgvin er fastamaður í vörn Levadiakos
Hörður Björgvin Magnússon og félagar hans í Levadiakos unnu 2-0 sigur á botnliði Panseirraikos í grísku úrvalsdeildinni í dag og fara því inn í nýtt ár í 4. sæti deildarinnar.
Enginn gat spáð fyrir um að Levadiakos yrði í baráttu um Evrópusæti fyrir þetta tímabil.
Levadiakos kemur frá Livadeia, sem er 30 þúsund manna bær í Boeotia-héraði og aðeins nokkur ár síðan liðið komst upp í efstu deild.
Hörður Björgvin samdi við liðið snemma á tímabilinu og er orðinn fastamaður í vörninni, en þar er hann með marga fyrrum liðsfélaga úr Panathinaikos.
Tveir þeirra komu að mörkunum gegn Panserraikos, en Slóveninn Benjamin Verbic skoraði snemma eftir að hafa komið inn á sem varamaður í síðari hálfleik og lagði þá Argentínumaðurinn Sebastian Palacios upp annað markið fyrir samlanda sinn Fabricio Pedrozo undir lok leiks.
Hörður lék allan leikinn í hjarta varnarinnar en þetta er annar leikurinn í röð sem liðið heldur hreinu og er það nú með 28 stig í 4. sætinu, níu stigum frá toppnum. Öskubuskuævintýri hjá Levadiakos sem er nú komið með það markmið að komast í Evrópukeppni í fyrsta sinn í sögu félagsins.
Athugasemdir
