Stuðningsmenn Albaníu og Ungverjalands létu öllum illum látum í I-riðli í undankeppni HM í kvöld en Ungverjarnir lentu í útistöðum við vallarstarfsmenn og lögreglu á meðan það þurfti að stöðva leik Albaníu og Póllands.
Ungversku stuðningsmennirnir sýndu skammarlega hegðun á Wembley í kvöld. Þeir byrjuðu á því að baula á leikmenn Englands fyrir leik er þeir krupu á hné í baráttu sinni gegn kerfisbundnum kynþáttafordómum.
Stuttu síðar lenti þeim saman við vallarstarfsmenn og þurfti lögregla að handtaka einn stuðningsmanninn fyrir að vera með kynþáttaníð í garð eins starfsmannsins.
Læti brutust út sem lögregla náði stjórn á. Leiknum lauk með 1-1 jafntefli. UEFA mun rannsaka málið frekar og gætu Ungverjar fengið sekt fyrir.
Pólland vann þá Albaníu 1-0. Þegar nokkrar mínútur voru eftir af leiknum neyddist dómarinn til að stöðva leik en albönsku stuðningsmennirnir köstuðu flöskum í leikmenn og fóru margir leikmenn pólska landsliðsins fram á að leikurinn yrði flautaður af.
Það var ákveðið að klára leikinn og tókst pólska liðinu að halda út og minnka þar með möguleika Albaníu á að komast á HM.
Pólland er í öðru sæti með 17 stig en Albanía í öðru með 15 stig þegar tveir leikir eru eftir.
Athugasemdir