„Ég er svekktur yfir því að vinna ekki þennan leik," sagði Sigurvin Ólafsson, þjálfari Þróttar, eftir 1-1 jafntefli gegn Leikni í 4. umferð Lengjudeildarinnar í kvöld.
Lestu um leikinn: Þróttur R. 1 - 1 Leiknir R.
Það má segja að tréverkið hafi ekki verið í liði með Þrótti.
„Við skutum allavega tvisvar í það og svo varði Óli Íshólm (markvörður Leiknis) alveg stórkostlega einu sinni. Það má með sanni segja að þetta hafi verið stöngin út."
Þó Sigurvin hafi verið svekktur með úrslitin var hann ánægður með frammistöðuna og er einnig sáttur með uppskeruna, 10 stig af 12 mögulegum.
„Þetta er fín byrjun og ég get ekki kvartað."
Aron Jóhannsson kom inn sem varamaður í seinni hálfleik en þessi reynslumikli leikmaður sem lék með Aftureldingu hefur ákveðið að hætta við leggja skóna á hilluna.
„Það er æðislegt að hann taki þátt í þessu með okkur. Hann er allur af vilja gerður til að leggja sitt af mörkum. Hann er bara nýkominn til æfinga og var aldrei að fara að spila meira en hann gerði í dag."
Viðtalið má sjá í heild sinni í sjónvarpinu hér að ofan en þar ræðir Venni meðal annars um það af hverju Aron Snær Ingason var tekinn af velli, um Örn Braga sem hefur byrjað mótið frábærlega og um aukna reynslu í leikmannahópi Þróttar.
