Íslenskir dómarar munu starfa á leik Litháen og Færeyja í C-deild Þjóðadeildarinnar á morgun.
Dómari leiksins er Vilhjálmur Alvar Þórarinsson, aðstoðardómarar Gylfi Már Sigurðsson og Birkir Sigurðarson og Þorvaldur Árnason mun starfa á leiknum sem fjórði dómari.
Þetta er fyrsti leikur íslenskra dómara þar sem VAR myndbandsdómgæslukerfi er notað. Vilhjálmur, Gylfi og Birkir fóru í gegnum VAR þjálfunarkerfi UEFA árið 2019 sem veitir þeim réttindi til þess að starfa á leikjum þar sem VAR er notað. Auk þess starfaði Vilhjálmur við þróun VAR fyrir fyrirtækið OZ Sports.
VAR dómarar leiksins í Litháen koma frá Þýskalandi og heita Pascal Müller og Markus Sinn.
Fleiri íslenskir dómarar í erlendum verkefnum
Helgi Mikael Jónasson og aðstoðardómarinn Egill Guðvarður Guðlaugsson verða í dómarateymum í undankeppni EM 2023 hjá U-19 landsliðum karla. Þeir félagar dæma tvo leiki í riðli tvö sem spilaður verður í Albaníu.
Þeir Ívar Orri Kristjánsson og aðstoðardómarinn Oddur Helgi Guðmundsson verða einnig í dómarateymum í undankeppni EM 2023 hjá U-19 landsliðum karla. Þeir dæma í riðli sjö sem spilaður verður í Belgíu.
Athugasemdir