The Pop Foot heldur úti ýmiskonar fótboltatölfræði og setti saman áhugaverðan lista yfir helstu meiðslapésa nútímaknattspyrnusögunnar.
Á listanum má finna menn eins og Franck Ribery, Arjen Robben og brasilíska Ronaldo en Arsenal á heiðurinn á því að hafa átt flesta leikmenn á þessum lista.
Frægasta dæmið er eflaust franski miðjumaðurinn Abou Diaby sem þótti afburða hæfileikaríkur en gat lítið sem ekkert spilað vegna meiðsla. Hann er meiddasti leikmaður fótboltasögunnar og missti í heildina af 1747 dögum vegna meiðsla. Það eru tæplega fimm ár.
Robben, sem lék aldrei fyrir Arsenal, er í öðru sæti listans eftir að hafa misst af 1507 dögum vegna meiðsla en Jack Wilshere kemur svo í þriðja sæti. Thomas Vermaelen, Tomas Rosicky, Danny Welbeck, Alex Oxlade-Chamberlain og Aaron Ramsey eru einnig á listanum. Í heildina eru því sjö fyrrum leikmenn Arsenal á lista yfir 20 meiðslahrjáðustu leikmennina.
Manchester United á einnig nokkra leikmenn á listanum þar sem Giuseppe Rossi og Phil Jones eru í ellefta og tólfta sæti. Welbeck ólst upp hjá Rauðu djöflunum áður en hann skipti til Arsenal og þá er Radamel Falcao einnig á listanum en hann stoppaði stutt hjá Man Utd.
Vincent Kompany, fyrrum fyrirliði Manchester City, er í fjórða sæti listans og má finna Ilkay Gündogan í nítjánda sæti.
Myndskýring: Frá vinstri er þetta dagafjöldi, leikjafjöldi og fjöldi meiðsla.