Roberto Firmino, leikmaður Liverpool á Englandi, er ekki að hugsa sér til hreyfings og vill vera áfram hjá enska félaginu en þetta segir hann í viðtali við brasilíska miðilinn TNT.
Undanfarna daga hafa verið háværir orðrómar um að Juventus og Liverpool væru nálægt því að ná samkomulagi um kaup og sölu á Firmino.
Talið var að Juventus myndi greiða 19 milljónir punda til að fá hann í sumar en hann á eitt ár eftir af samningi.
Firmino er með reyndustu leikmönnum liðsins en hann hefur spilað fyrir félagið frá 2015 og gert 98 mörk í 328 leikjum.
Brasilíumaðurinn byrjaði í 3-1 sigri Liverpool á Manchester City í gær er liðin spiluðu um samfélagsskjöldinn og greindi þá frá því eftir leik að hann gæti ekki hugsað sér að yfirgefa félagið í sumar.
„Ég elska liðið. borgina og stuðningsmennina. Ég vil vera áfram hjá Liverpool," sagði Firmino.
Athugasemdir
