Kompany hefur verið í umræðunni undanfarna daga en góðgerðarleikur tileinkaður honum fer fram í þessum skrifuðu orðum.

Belgíski leikmaðurinn, sem lék í ellefu ár með Man City, var beðinn um að velja besta varnarmann ensku úrvalsdeildarinnar frá upphafi og valdi hann hollenska leikmanninn Virgil van Dijk framyfir menn á borð við John Terry og Rio Ferdinand.

„Ég myndi segja Virgil van Dijk. Hann hefur ekki verið jafn lengi og Terry og Ferdinand í deildinni en hann hefur sýnt merki um það síðustu ár að hann er betri," sagði Kompany.

„Hann hefur sýnt það að ef hann hefði verið hérna í mörg ár þá væri hann á toppnum í langan tíma. Liverpool-liðið áður en Van Dijk kom og svo eftir að hann kom, þú sérð bara tvö ólík lið og ég verð að gefa honum það," sagði hann í lokin.

Van Dijk kom til Liverpool í janúar árið 2018 en hann hefur farið í tvo úrslitaleiki í Meistaradeild Evrópu og var í sigurliðinu sem lagði Tottenham, 2-0, í júní. Liðið barðist þá við Man City um titilinn á síðustu leiktíð en endaði með 97 stig, aðeins stigi minna en Man City.