,,Við gerðum eiginlega akkúrat það sem þurfti. Við vorum ekki að spila neinn sérstakan leik og vorum langt frá okkar besta en þetta nægði sem betur fer," sagði Þórður Einarsson leikmaður KB eftir að liðið tryggði sér sæti í undanúrslitum í úrslitakeppni 3.deildarinnar eftir framlengdan leik gegn Berserkjum í kvöld.
KB tapaði 3-2 í kvöld en fór áfram samanlagt 4-3. Þórður skoraði mikilvægt mark þegar hann minnkaði muninn í 2-1 í leiknum í kvöld.
,,Ég þurfti andskotann ekki að gera neitt. Gummi (Guðmundur Guðnason) gerði þetta fáránlega vel, ég veit ekki hvernig hann komst framhjá þeim þremur. Ég var reyndar búinn að klúðra þremur dauðafærum í leiknum þannig að ég skuldaði svolítið," sagði Þórður sem fagnaði markinu ógurlega.
,,Maður fékk svolítið kick þegar maður skoraði en þetta var lengsti spretturinn minn í leiknum held ég."
KB mun núna mæta Dalvík/Reyni í undanúrslitunum en fyrri leikurinn verður í Breiðholtinu á laugardag.
,,Við erum ekki að fara að keyra á Dalvík til að tapa, ég held að það sé alveg ómögulegt. Ég held að fyrirfram hafi þeir verið líklegastir til að vinna þessa deild og með bestu leikmennina. Ég held að það hljóti að vera einhverjar brotalamir í þeirra liði. Þetta verður erfiður leikur en við eigum alveg séns."
Hér að ofan má sjá viðtalið í heild sinni.
