Ítalía í dag - Stórleikur í Napolí og Mikael mætir meisturunum

Stórleikur dagsins hefst í hádeginu þegar topplið Napoli fær Atalanta í heimsókn, en það eru sex stig sem skilja liðin að í toppbaráttunni.

Napoli er á miklu flugi undir stjórn Antonio Conte og er komið með 25 stig eftir 10 fyrstu umferðirnar á nýju tímabili.

Fiorentina heimsækir svo Torino en Albert Guðmundsson verður ekki með vegna meiðsla. Fiorentina er á góðu skriði með fjóra sigra í röð á meðan Torino er búið að tapa fjórum af síðustu fimm leikjum sínum.

Roma heimsækir svo Verona áður en ríkjandi Ítalíumeistarar í liði Inter fá Mikael Egil Ellertsson og félaga í heimsókn frá Feneyjum.

Nýliðar Venezia eru með 8 stig eftir 10 umferðir og hefur Mikael Egill verið að leika mikilvægt hlutverk á miðjunni.

Bjarki Steinn Bjarkason er að ná sér aftur eftir meiðsli en hann er búinn að missa af öllu upphafi tímabilsins með Feneyingum. Hann fékk mikinn spiltíma á síðustu leiktíð og gæti fengið að spreyta sig í fyrsta sinn í efstu deild í dag, á San Siro leikvanginum fræga.

Leikir dagsins:
11:30 Napoli - Atalanta
14:00 Torino - Fiorentina
17:00 Verona - Roma
19:45 Inter - Venezia