Íslenskir leikmenn héldu áfram að gera góða hluti í háskólaboltanum í Bandaríkjunum síðastliðnar tvær vikur.
Þar ber helst að nefna að Sigurður Steinar Björnsson, fyrrum leikmaður Víkings R., skoraði seinna markið Santa Barbara í 2-0 sigri liðsins á Sacramento State. Hann var á dögunum valinn nýliði ársins, “Freshman of the Year”, í Big West deildinni.
Heiðar Máni Hermannsson, leikmaður Hauka, var í rammanum í byrjunarliði Stony Brook og hélt hreinu í tveimur 3-0 sigurleikjum á Northeastern og Drexel. Heiðar var valinn nýliði vikunnar, “Rookie of the Week”, í deildinni fyrir sína frammistöðu í leikjunum
Alexander Clive Vokes, leikmaður Selfoss, skoraði eitt af mörkum Albany í 2-0 sigri á Binghamton ásamt því að leggja upp eina mark liðsins í 1-1 jafntefli gegn UMass Lowell.
Arnór Sölvi Harðarson, leikmaður ÍR, skoraði eina mark UNC Asheville í 1-2 tapi liðsins gegn Gardner-Webb.
Hilmar Starri Hilmarsson, leikmaður Þróttar V., skoraði sitt fyrsta mark fyrir South Carolina Upstate í 2-2 jafntefli gegn Longwood og fagnaði vel og innilega.
Kristján Snær Frostason, leikmaður HK, var í byrjunarliði Dayton í tveimur 1-0 sigrum liðsins á George Washington og Loyola Chicago.
Páll Veigar Ingvason, leikmaður Þór Ak., var með stoðsendingu í báðum sigurleikjum Hawaii Hilo á Point Loma og á Concordia.
Róbert Kolbeins Þórarinsson, leikmaður KFG, lét til sín taka fyrir Eckerd. Róbert skoraði eina mark liðsins í 1-3 tapi gegn Florida Tech og var svo með stoðsendingu í sterkum 1-0 sigri á Tampa.
Davíð Ívarsson, leikmaður Álafoss, átti hvern stórleikinn á fætur öðrum fyrir Thomas ME með mark og stoðsendingu í 3-3 jafntefli liðsins við Husson, stoðsendingu í 6-0 stórsigri á MPI og svo mark og tvær stoðsendingar í 3-1 sigri á Maine. Davíð var valinn leikmaður vikunnar fyrir sínar frammistöður.
Ída Marín Hermannsdóttir, leikmaður FH, skoraði annað marka LSU í sterkum 2-0 sigri á Tennessee.
Júlía Ruth Thasaphong, leikmaður Víkings R., hjá Oral Roberts var nýlega valin sóknarmaður ársins, “Offensive Player of the Year, í Summit League deildinni og einnig valin í lið ársins í deildarkeppninni.
Ólöf Freyja Þorvaldsdóttir, leikmaður KR, var aftur á skotskónum fyrir West Florida í 3-0 sigri liðsins á móti West Alabama.
Auður Helga Halldórsdóttir, leikmaður Selfoss, fór fyrir sínu liði Wingate í 6-1 stórsigri á Emory & Henry. Auður skoraði tvö mörk og lagði upp eitt.
Dagbjört Líf Guðmundsdóttir, leikmaður ÍA, var allt í öllu fyrir USAO, University of Science and Arts of Oklahoma, í tveimur sigurleikjum liðsins. Dagbjört var með mark í 7-0 sigri á Southwestern Christian og bæði mörkin í 2-0 sigri á Nelson Texas.
Marey Edda Helgadóttir, leikmaður ÍA, var með tvær stoðsendingar fyrir Life U í 3-0 sigri liðsins á Thomas U. Marey er með 11 stoðsendingar á tímabilinu til þessa.
