Alfreð Finnbogason framherji Íslands var að vonum kampakátur eftir gríðarlega sterkan sigur á Króötum í kvöld.
Lestu um leikinn: Ísland 1 - 0 Króatía
„Frábær tilfinning. Það stemmdi allt í 0-0, mjög lokaður leikur og það sást að þeir voru nokkuð sáttir með 0-0, þannig bara geggjað að klára þetta í lokin og halda þessu geggjaða recordi á heimavelli."
Alfreð var "eini" eiginlegi framherjinn í liðinu í dag en hann hafði Gylfa Þór sér til halds og traust uppá toppi í kvöld.
„Ég vissi alveg að það yrði erfitt, ég hef spilað á móti þeim tvisvar áður og þetta var svona leikur sem maður þarf að halda varnarlínunni og vera að berjast, vinna og reyna að skrapa upp þessi móment sem við fáum. Maður var að vonast eftir 1-2 mómentum sem maður var að vonast eftir stungum eða reboundi."
Sigurmarkið kom seint í leiknum og segir Alfreð að liðið hafi ekki verið búið að sætta sig við jafntefli í leiknum.
„Nei, ef það er eitthvað lið sem átti skilið að vinna þá vorum það við. Við vorum að halda áfram að halda áfram að berjast. Við sóttum okkar lukku í þessum leik."
Alfreð hefur átt erfitt uppdráttar á tímabilinu sem var að ljúka en hann hefur verið að kljást við erfið meiðsli. Hann metur það mikils að hafa lokað tímabilinu með stæl í kvöld.
„Já það er geggjað. Þetta var langt og á tímabili leiðinlegt tímabil en að enda það svoleiðis að halda okkur uppi með félagsliðinu og maður er búin að vera með þennan leik í hausnum lengi og hversu frábært það yrði að klára tímabilið með sigri á Króötum."
