Spænska stórveldið Real Madrid laut í lægra haldi fyrir Real Mallorca, 2-1, á Majorka í La Liga í dag.

Madrídingar höfðu unnið fimm í röð í öllum keppnum fram að þessum leik á meðan Mallorca hafði unnið aðeins einn af síðustu sjö deildarleikjum sínum.

Arda Güler fékk besta færi Madrídinga í fyrri hálfleiknum er hann fékk boltann vinstra megin í teignum en skot hans var beint á Leo Roman í markinu.

Manu Morlanes refsaði Güler fyrir þetta klúður. Pablo Maffeo, einn versti óvinur Madrídinga og Vinicius Jr, kom með fyrirgjöf frá hægri inn á teiginn. Morlanes kom með seinni bylgjunni, tók á móti boltanum og stýrði honum örugglega í netið.

Agalegur varnarleikur hjá Madrídingum að lesa ekki í hlaupið hans.

Þeir komu til baka á 88. mínútu er Eder Militao þrumuskallaði hornspyrnu Trent Alexander-Arnold efst í hægra hornið en þeir fengu rennblauta tusku í andlitið í uppbótartíma.

Þar leit vörn Real ekkert sérstaklega vel út heldur. Roman sparkaði boltanum langt fram og unnu Mallorca einvígin í fremstu víglínu, boltanum komið inn á Muriqi sem setti boltann í þaknetið.

Nítjánda deildarmark Kósóvó-mannsins á tímabilinu og eitt það mikilvægasta en það kom Mallorca upp úr fallsæti og í 17. sæti með 31 stig á meðan Madrídingar eru við það að stimpla sig úr titilbaráttunni en liðið er með 69 stig í öðru sæti, fjórum stigum á eftir Barcelona sem á leik til góða.