Annar óvænti stórsigurinn í þýsku deildinni kom í síðasta leik dagsins en Köln valtaði yfir Werder Bremen, 7-1, en alls voru sex mörk skoruð í fyrri hálfleik.

Þessi lið eru hlið við hlið í deildinni og mátt því búast við hörkuleik í Köln en svo var aldeilis ekki.

Linton Maina skoraði fyrsta mark heimamanna á 9. mínútu og þá gerði Steffen Tigges tvö mörk á sex mínútum. Ellyes Skhiri og Denis Huseinbasic gerðu tvö til viðbótar áður en Nicklas Fullkrug minnkaði muninn þegar sjö mínútur voru eftir af fyrri hálfleik.

Skhiri gerði annað mark sitt á 54. mínútu áður en Bremen kórónaði ömurlegan dag sinn er Marco Friedl skoraði í eigið net tæpum fimmtán mínútum fyrir leikslok.

Köln er í 10. sæti með 20 stig, einu stigi á eftir Bremen sem er í 9. sætinu.