Lestu um leikinn: Þór/KA 2 -  1 Tindastóll

Þór/KA og Tindastóll áttust við í fyrri leik dagsins í Bestu deild kvenna og tóku gestirnir frá Sauðárkróki forystuna snemma leiks þegar Makala Woods kom boltanum í netið.

Makala var vel staðsett og hafði heppnina með sér þegar boltinn datt fyrir hana innan vítateigs hjá Akureyringum í kjölfar aukaspyrnu.

Þór/KA var sterkari aðilinn en átti í erfiðleikum með að skapa sér færi, á meðan Stólarnir vörðust vel og fengu hættulegt færi eftir varnarmistök en tókst ekki að nýta það. Staðan 0-1 í leikhlé.

Makala komst nálægt því að tvöfalda forystuna í upphafi síðari hálfleik en tókst ekki. Þór/KA refsaði með jöfnunarmarki í kjölfarið, þegar Karen María Sigurgeirsdóttir skoraði með góðu skoti eftir að hafa hæft stöngina skömmu áður.

Leikurinn var rólegur eftir þetta og lítið um færi þar til Bríet Jóhannsdóttir kom boltanum í netið með ótrúlegu marki á 88. mínútu. Hún var með boltann við vítateigshornið og gaf sendingu meðfram jörðinni sem fór í gegnum allan pakkann í vítateignum og rúllaði alla leið yfir marklínuna. Bríet skoraði þannig með sendingu sem varnarmenn Tindastóls réðu ekki við.

Þetta reyndist sigurmark leiksins og heppilegur sigur Þórs/KA staðreynd.

Akureyringar eru komnar með sex stig eftir tvær umferðir. Sauðkrækingar eru með þrjú stig eftir að hafa lagt FHL að velli í fyrstu umferð.