Hólmfríður samdi við Selfoss fyrir sumarið en hún hafði verið í fæðingarorlofi.

Hún hefur leikið með félögum á borð við KR, ÍBV, Val, Kristianstad, Avaldsnes og Philadelphia Independence en hún er uppalin hjá KFR.

Hólmfríður spilaði 18 leiki og skoraði 8 mörk fyrir Selfoss í deild- og bikar í sumar en hún skoraði meðal annars í úrslitaleik bikarsins þar sem Selfoss vann fyrsta stóratitilinn í sögu félagsins.

Hún hefur nú framlengt samning sinn við Selfoss um eitt ár en hún var ánægð eftir undirskriftina.

„Ég sé ekki fyrir mér að hætta núna fyrst það er búið að ganga svona vel í sumar og líkaminn er í góðu standi. Það spilar líka inní að hugur Selfyssinga er að taka næsta skref og ég vil vera með í því. Eins og við spiluðum seinni umferðina í sumar, ef við höldum áfram og byggjum ofan á það þá getum við náð í fleiri stig á næsta ári

„Ég þekkti voðalega fáa þegar ég kom hingað en það er búið að vera frábært að kynnast fólkinu hérna og félaginu. Þetta er eitthvað allt annað en Reykjavíkurliðin. Samfélagið hérna stendur allt saman og allir í kringum félagið. Það er gott fólk að vinna í kringum liðið og allir hjálpast að og það gerir þetta einstakt," sagði hún við undirskrift.