Sænski framherjinn Alexander Isak meiddist í 5-1 sigri Liverpool á Eintracht Frankfurt í Meistaradeildinni í kvöld en þetta staðfesti Arne Slot, stjóri liðsins, í viðtali við TNT Sports eftir leik.
Isak, sem kom til Liverpool fyrir metfé frá Newcastle í sumar, byrjaði leikinn hjá Englandsmeisturunum en var óvænt tekinn af velli í hálfleik.
Svíinn var kominn í gott leikform eftir að hafa neitað að taka þátt í undirbúningstímabilinu með Newcastle, en hann er nú kominn á meiðslalista Liverpool.
Slot sagði eftir leikinn við Frankfurt að Isak hefði meiðst í nára.
„Hann þurfti að fara af velli því hann fann til í náranum. Ég hef sagt það mörgum sinnum að það er erfitt að finna jafnvægi fyrir leikmann sem hefur misst úr þrjá mánuði. En við vonum auðvitað það besta,“ sagði Slot eftir leikinn.
Isak var að spila áttunda leik sinn í Liverpool-treyjunni, en hann hefur aðeins skorað eitt mark og gefið eina stoðsendingu til þessa.
Athugasemdir
