Liverpool heimsótti Eintracht Frankurt til Þýskalands og byrjaði þetta eins og í svo mörgum öðrum leikjum.

Poolarar lentu undir á 26. mínútu eftir stórgóða sókn Frankfurt, en það var Rasmus Kristensen sem batt endahútinn á hana með hörkuskoti í stöng og inn. Óverjandi fyrir Giorgi Mamardashvili í marki Liverpool.

Svar Liverpool-manna var hátt og skýrt. Hugo Ekitike jafnaði metin gegn sínu gamla félagi eftir skyndisókn. Andy Robertson kom löngum bolta fram völlinn á Ekitike sem keyrði upp að marki heimamanna og lagði boltann undir markvörð liðsins og í netið.

Yfirlýsing frá Frakkanum eftir að hafa verið á bekknum í síðustu leikjum.

Liverpool skoraði tvö til viðbótar í fyrri hálfleiknum. Virgil van Dijk stangaði hornspyrnu Cody Gakpo í netið og nokkrum mínútum síðar var það Ibrahima Konate sem skoraði með svipað öflugum skalla eftir hornspyrnu Dominik Szoboszlai.

Flott veganesti inn í hálfleikinn og í þeim síðari náðu gestirnir að bæta tveimur til viðbótar.

Wirtz, sem hefur verið harðlega gagnrýndur í byrjun tímabils, kom að fyrstu mörkum sínum á tímabilinu. Hann átti hnitmiðaða sendingu inn á Cody Gakpo sem skoraði af stuttu færi og þá lagði hann upp annað mark er hann 'tíaði' boltann upp fyrir Szoboszlai sem skoraði með föstu skoti fyrir utan teig.

Taphrinu Liverpool er formlega lokið og er liðið nú með sex stig eftir þrjá leiki í Meistaradeildinni, en Frankfurt með þrjú stig.

Chelsea vann Ajax með sömu markatölu á Stamford Bridge.

Enzo Maresca gerði fjölmargar breytingar á byrjunarliði sínu en það virtist engu máli skipta.

Marc Guiu og Moises Caicedo komu Chelsea í 2-0 á fyrsta hálftímanum, en rétt fyrir fyrsta markið fékk Kenneth Taylor, miðjumaður Ajax, að líta rauða spjaldið.

Wout Weghorst minnkaði muninn fyrir Ajax með marki úr vítaspyrnu er Tosin Adarabioyo steig á tærnar á sóknarmanni Ajax.

Chelsea fékk sömuleiðis vítaspyrnu undir lok fyrri hálfleiksins, en það var Weghorst sem þrumaði Enzo Fernandez niður í teignum. Sá dómur þótti umdeildur, en Weghorst taldi sig hafa tekið boltann, en ekki manninn.

Enzo fór sjálfur á punktinn og skoraði, en áður en hálfleikurinn var úti fengu heimamenn aðra vítaspyrnu og var hún töluvert umdeildari en fyrri en þá féll Estevao Willian í grasið með tilþrifum og við litla snertingu.

Brasilíumaðurinn fékk leyfi til að taka spyrnuna og skoraði hann örugglega úr henni.

Heimsmeistararnir fóru með þriggja marka forystu inn í hálfleikinn og bættu síðan fimmta markinu við snemma í þeim síðari er varamaðurinn Tyrique George skoraði. Þriðji táningurinn sem skoraði fyrir Chelsea í leiknum og skráði sig og hina táningana í sögubækurnar, enda í fyrsta sinn sem þrír táningar skora í sama leiknum í keppninni.

Sigur Chelsea kemur liðinu í 6 stig eftir þrjá leiki en Ajax er án stiga á botninum.

Mónakó og Tottenham gerðu markalaust jafntefli í Mónakó, þar sem heimamenn fengu urmul af færum til þess að skora.

Guglielmo Vicario var besti maður Tottenham og varði eins og berserkur. Mögnuð frammistaða hjá honum, en Tottenham er með 5 stig en Mónakó aðeins tvö stig.

Jude Bellingham var hetja Real Madrid í 1-0 sigri liðsins á Juventus á Santiago Bernabeu. Madrídingar eru með fullt hús stiga en Juventus byrjað illa og aðeins með tvö stig.

Bayern München vann öruggan 4-0 sigur á Club Brugge á Allianz-leikvanginum. Hinn 17 ára gamli Lennart Karl kom þeim á bragðið á 5. mínútu og skoraði Harry Kane síðan 20. mark sitt á tímabilinu aðeins níu mínútum síðar.

Luis Díaz og Nicolas Jackson komust einnig á blað fyrir Bayern sem er eins og Real Madrid með fullt hús stiga.

Sporting lagði Marseille að velli, 2-1, eftir að hafa lent marki undir og þá gerðu Atalanta og Slavía Prag markalaust jafntefli.

Úrslit og markaskorarar:

Monaco 0 - 0 Tottenham

Real Madrid 1 - 0 Juventus
1-0 Jude Bellingham ('58 )

Eintracht Frankfurt 1 - 5 Liverpool
1-0 Rasmus Kristensen ('26 )
1-1 Hugo Ekitike ('35 )
1-2 Virgil van Dijk ('39 )
1-3 Ibrahima Konate ('44 )
1-4 Cody Gakpo ('66 )
1-5 Dominik Szoboszlai ('70 )

Chelsea 5 - 1 Ajax
1-0 Marc Guiu ('18 )
2-0 Moises Caicedo ('27 )
2-1 Wout Weghorst ('33 , víti)
3-1 Enzo Fernandez ('45 , víti)
4-1 Estevao ('45 , víti)
5-1 Tyrique George ('48 )
Rautt spjald: Kenneth Taylor, Ajax ('15)

Atalanta 0 - 0 Slavia Praha

Sporting 2 - 1 Marseille
0-1 Igor Paixao ('14 )
1-1 Geny Catamo ('69 )
2-1 Alisson Santos ('86 )
Rautt spjald: Emerson, Marseille ('45)

Bayern 4 - 0 Club Brugge
1-0 Lennart Karl ('5 )
2-0 Harry Kane ('14 )
3-0 Luis Diaz ('34 )
4-0 Nicolas Jackson ('79 )