West Ham United tók á móti Brentford í Lundúnaslag í eina leik kvöldsins í ensku úrvalsdeildinni.

Brentford var talsvert sterkara liðið í fyrri hálfleik og voru gestirnir óheppnir að skora ekki fyrr en á 43. mínútu. Igor Thiago setti boltann þá í netið og endurtók leikinn nokkrum mínútum síðar, en það var ekki dæmt gilt vegna ótrúlega naumrar rangstöðu eftir athugun í VAR-herberginu.

Síðari hálfleikurinn var tíðindalítill þar sem meira jafnræði ríkti með liðunum, en Hamrarnir gerðu sig þó ekki líklega til að jafna metin. Þeir komust í nokkrar hættulegar stöður í uppbótartímanum án þess þó að valda Caoimhín Kelleher áhyggjum á milli stanganna.

Gestirnir frá Brentford svöruðu með að geysast upp í sókn þar sem Mathias Jensen innsiglaði sigurinn með góðu skoti aðeins nokkrum mínútum eftir innkomu sína af bekknum. Lokatölur 0-2.

Brentford er þá komið með 10 stig eftir 8 umferðir og skilur West Ham eftir í fallsæti með 4 stig.

Þetta var þriðji leikur Nuno Espírito Santo við stjórnvölinn hjá West Ham en næstu leikir liðsins eru gegn Leeds, Newcastle, Burnley og Bournemouth.

Brentford á erfiðari leiki framundan, gegn Liverpool, Crystal Palace, Newcastle og Brighton.

Hákon Rafn Valdimarsson, varamarkvörður Brentford, sat á bekknum.