Rúnar Kristinsson þjálfari Fram lofsöng Heimi Guðjónsson í viðtali eftir leik Fram við Stjörnuna í gær. Fram mætir FH í síðasta leik tímabilsins og lokaleik Heimis með FH.
Í viðtali við mbl.is eftir leik í gær sagði Rúnar það skrítna tilhugsun að hugsa til þess að það verði einhver annar á hliðarlínunni hjá FH en Heimir á næsta tímabili.
„Það er skemmtilegt að mæta vini mínum Heimi í kveðjuleiknum hans hjá FH, sem er reyndar algjör synd. Við munum berjast við þá eins og við höfum gert í ár. Við höfum nú þegar spilað þrisvar við þá í sumar og þetta hafa verið hörkurimmur.“
FH er í 5. sæti í deildinni með jafn mörg stig og Fram en FH er með betri markatölu.
„Ég vil leyfa mér að segja að enginn þjálfari á Íslandi hefði komið FH í topp 6 annar en Heimir. Miðað við hvaða leikmenn hann missti, hvaða mannskap hann var með, mikið af ungum leikmönnum, og öll þau meiðsli sem liðið glímdi við í byrjun tímabils.“
„Það verður vissulega gaman að mæta þeim og enda tímabilið á baráttu við þá. Vonandi getum við strítt þeim og nælt í fimmta sætið,“ sagði Rúnar að lokum.
| Lið | L | U | J | T | Mörk | mun | Stig |
|---|---|---|---|---|---|---|---|
| 1. Víkingur R. | 26 | 16 | 6 | 4 | 56 - 31 | +25 | 54 |
| 2. Valur | 26 | 13 | 6 | 7 | 61 - 44 | +17 | 45 |
| 3. Stjarnan | 26 | 12 | 6 | 8 | 48 - 42 | +6 | 42 |
| 4. Breiðablik | 26 | 10 | 9 | 7 | 43 - 40 | +3 | 39 |
| 5. FH | 26 | 8 | 9 | 9 | 46 - 42 | +4 | 33 |
| 6. Fram | 26 | 9 | 6 | 11 | 37 - 37 | 0 | 33 |
