Chris Wilder og lærisveinar hans í Sheffield United unnu sannfærandi 3-0 sigur á nágrönnum sínum í Sheffield Wednesday í ensku B-deildinni í dag.

Wilder var látinn taka poka sinn hjá United í sumar eftir að honum mistókst að koma liðinu upp í úrvalsdeildina og var Ruben Selles fenginn til þess að stýra liðinu.

Ömurleg byrjun Selles varð til þess að hann var rekinn eftir að hafa tapað fyrstu fimm leikjum tímabilsins og var Wilder ráðinn aftur til starfa.

Það hefur tekið tíma að koma liðinu aftur á beinu brautina og er það verkefni sem er enn í gangi, en liðið er að minnsta kosti með montréttinn í Sheffield næstu mánuði.

Tyrese Campbell gerði sér lítið fyrir og skoraði tvö mörk. Fyrra markið gerði hann eftir að United vann boltann hátt upp á vellinum, boltinn færður inn vinstra megin í teiginn á Campbell sem skoraði með föstu skoti í fjærhornið og seinna markið kom snemma í síðari hálfleik er hann fékk boltann inn fyrir, nýtti sér leifturhraða sinn og kláraði síðan með góðu skoti í hægra hornið.

Tom Cannon gerði út um leikinn í uppbótartíma með skoti fyrir utan teig, sem hafði viðkomu af varnarmanni og neðst í fjærhornið.

Fjórði sigur Sheffield United á tímabilinu og liðið í 22. sæti með 13 stig, einu stigi frá öruggu sæti, en Wednesday í verri málum á botninum með fjögur stig í mínus.

Ástæða þess er að félagið var sett í greiðslustöðvun og var því refsað með -12 stigum í lok október.