Benoný Breki Andrésson og félagar hans í Stockport County töpuðu annan deildarleikinn í röð er liðið lá fyrir Peterborough, 3-0, í ensku C-deildinni í kvöld.
Framherjinn var ekki með í síðasta leik en kom inn í byrjunarliðið í kvöld.
Hann spilaði fyrri hálfleikinn er Stockport tapaði öðrum deildarleiknum í röð eftir annars frábæra byrjun á tímabilinu.
Kyrell Lisbie skoraði eitt af mörkum Peterborough. Hann er sonur Jamaíkumannsins Kevin Lisbie sem gerði garðinn frægan með Charlton Athletic í byrjun aldarinnar.
Stockport er þrátt fyrir tapið í öðru sæti deildarinnar með 28 stig, jafnmörg og Lincoln sem er á toppnum með betri markatölu.
Athugasemdir
