Leik Aftureldingar og Kórdrengja í Lengjudeild karla hefur verið frestað um óákveðinn tíma en smit kom upp í hópnum hjá Kórdrengjum.
Leikurinn átti upphaflega að fara fram klukkan 19:15 í gær en þá bárust fregnir af því að einn aðili sem var nátengdur einum af leikmönnum Kórdrengja hefði smitast af Covid-19.
Leikmenn voru því sendir í skimun og leiknum við Aftureldingu frestað til 14:00 í dag. Það verður hins vegar ekkert af leiknum en það er komið í ljós að einn af leikmönnum Kórdrengja er með veiruna og leiknum því frestað.
Þetta er annar leikurinn sem þarf að fresta í Lengjudeildinni á skömmum tíma en leik Víking Ó. og Fram var frestað eftir að allur leikmannahópur Víkings var sendur í sóttkví eftir að leikmaður liðsins greindist með veiruna.
Ekki er búið að finna nýjan leiktíma á leikina.
ATHUGIÐ! Leiknum gegn Kórdrengjum sem átti að fara fram núna kl. 14:00 hefur verið frestað eftir að upp kom smit í leikmannahópi Kórdrengja.
— Afturelding (@umfafturelding) July 24, 2021
Athugasemdir