Íslenski framherjinn Kolbeinn Sigþórsson skoraði 25. mark sitt fyrir landsliðið í 4-2 tapinu gegn Albaníu í gær.
Kolbeinn, sem er fæddur árið 1990, spilaði 52. landsleik sinn í gær og nýtti tækifærið er hann kom inná og jafnaði metin, 2-2.
Þetta var annað mark hans á nokkrum dögum en hann skoraði einnig í 3-0 sigrinum á Moldóvum.
Kolbeinn er kominn með 25 mörk en hann er nú einu marki frá því að jafna Eið Smára Guðjohnsen, sem er með 26 mörk og er markahæsti leikmaður Íslands frá upphafi.
Eiður gerði 26 mörk í 88 landsleikjum en Kolbeinn hefur spilað töluvert færri leiki.
Gylfi Þór Sigurðsson er í þriðja sæti en hann er með 21 mark í 70 landsleikjum.
Athugasemdir