Bernardo Silva og félagar undirbúa sig undir það að koma inn á völlinn
Bernardo Silva, leikmaður Manchester City á Englandi, spilaði sinn fyrsta leik fyrir félagið í dag en hann kom frá AS Mónakó í Frakklandi, núna í sumar. Hann lék í 3-0 sigrinum á West Ham í dag á Laugardalsvelli.
Lestu um leikinn: Manchester City 3 - 0 West Ham
Bernardo kom inná sem varamaður í síðari hálfleik og sáust hæfileikar hans strax skína. Hann átti þátt í þriðja marki City er hann skaut boltanum í varnarmann og þá náði Raheem Sterling að skora.
Hann var ánægður með frumraun sína í dag.
„Ég er mjög ánægður með að vera hérna. Fyrstu þrjátíu mínúturnar mínar og mér leið mjög vel og það er gott að vera hérna og vera partur af liðinu," sagði Bernardo.
„Já klárlega. Þetta er bara byrjunin hjá mér því ég var bara að koma til móts við liðið. Ég mun leggja hart að mér og liðið hefur gert mjög vel í síðustu þremur æfingaleikjum og það hefur bætt sig gríðarlega."
Bernardo er hrifinn af Íslandi en eins og Arnautovic hjá West Ham þá þykir honum of kalt hér á landi.
„Ég vona að við getum haldið áfram að gera góða hluti í deildinni. Það er frábært að koma hingað til Íslands, svolítið kalt. Þetta er í fyrsta sinn sem ég kem hingað en það er frábært að vera hér," sagði hann í lokin.
