 |
Varnarjaxlinn Ragnar Sigurðsson er til í slaginn.
 |
Leikurinn á Laugardalsvelli á þriðjudag verður sá fyrsti í nýrri keppni og Ragnar ræddi málin við Fótbolta.net á landsliðsæfingu í gær.
,,Menn eru mjög vel gíraðir. Það er búið að vera góð stemning síðan við mættum og góðar æfingar, þannig að allir eru klárir. Það er mjög gott að ná inn mörgum æfingum og vinna í taktísku hlutunum þar sem við fengum ekki æfingaleik," sagði Ragnar við Fótbolta.net.
,,Þetta er hörkulið og það eru fleiri hörkulið í þessum riðli, en við erum bjartsýnir á fyrsta leik í þessum riðli. Það er mikill meðbyr og sjálfstraust og þjóðin er á bakvið okkur, en við megum klárlega ekki ofmetnast. Við þurfum að vinna fyrir þessu alveg eins og í síðustu keppni."
Ragnar býst við góðum stuðningi frá áhorfendum, enda er verulega góð stemning komin með landsliðinu.
,,Það verður pottþétt uppselt. Tólfan verður á sínum stað þannig það verður góð stemning á vellinum," sagði Ragnar.
Ragnar fór í endajaxlatöku á dögunum en segist nokkurn veginn vera búinn að jafna sig.
,,Það er einhver smá bólga eftir, en það skiptir engu máli. Þegar leikurinn byrjar gleymist allt svoleiðis, ég verð pottþétt orðinn góður á þriðjudaginn," sagði varnarmaðurinn, sem hrósaði Alberti Brynjari Ingasyni vini sínum og Fylkismanni fyrir frábært orðagrín á Facebook.
Albert setti inn myndband á Facebook eftir endajaxlatöku Ragnars sem hefur fengið yfir 200 like og á þriðja tug deilinga.
,,Þetta var mjög fyndið, þetta er bara classic Albert. Hann fékk líka mjög góðar viðtökur við þessu á Facebook einmitt," sagði Ragnar hress að lokum.
