Mynd: EPA

Spánverjar eru Ólympíumeistarar eftir sigur í mögnuðum framlengdum leik gegn heimamönnum í Frakklandi.

Frakkar komust yfir þegar Enzo Millot nýtti sér mikinn vandræðagang í vörn Spánverja og átti skot sem fór beint á Arnau Tenas en honum tókst ekki að halda boltanum frá því að enda í netinu.

Spánverjar settu í fluggírinn og náðu tveggja marka forystu með þremur mörkum á tíu mínútna kafla áður en flautað var til loka fyrri hálfleiks. Fermin Lopez hefur verið frábær á mótinu en hann skoraði tvö af mörkum liðsins í kvöld.

Þessum leik var hvergi nærri lokið því Frakkar náðu að minnka muninn og í uppbótatíma fengu þeir vítaspyrnu eftir að Benat Turrientes braut á Arnaut Kalimuendo og Jean-Phillipe Mateta skoraði úr spyrnunni og jafnaði metin áður en flautað var til loka venjulegs leiktíma.

Sergio Camello tryggði Spánverjum Ólympíugullið með tveimur mörkum í framlengingunni.