Hörður Björgvin vill komast í Premier league sem fyrst.
„Það er auðvitað alltaf gaman þegar svona stór lið eru að fylgjast með manni. Vonandi er eitthvað rétt í þessu," segir landsliðsmaðurinn Hörður Björgvin Magnússon um fréttir þess efnis að Everton og Tottenham hafi áhuga á að fá hann í sínar raðir.
„Markmiðin liggja alltaf upp á við og vonandi kemst maður í Premier league eins fljótt og hægt er."
Herði hefur gengið mjög vel síðan hann kom í enska boltann en hann gekk í raðir Bristol City í Championship-deildinni síðasta sumar. Þar hefur hann leikið vel og vakið athygli fyrir frammistöðu sína.
„Þetta er búið að vera rosalega gaman. Það er aðalástæða þess að mér gengur svona vel. Það er rosagott að vera þarna og ég er hrikalega ánægður með þetta," segir Hörður sem telur sig vera að taka bætingum hjá Bristol.
„Ég get alveg séð það sjálfur. Ég hef aðlagast enska boltanum vel og tekið framförum. Vonandi held ég áfram að bæta mig sem leikmaður."
Viðtalið má sjá í heild í sjónvarpinu hér að ofan en þar talar Björgvin meðal annars um að gott sé að koma aftur til Ítalíu þar sem hann spilaði áður en hann fór til Bristol. Hörður er ásamt öðrum landsliðsmönnum Íslands í Parma að búa sig undir stóran leik í Zagreb á laugardag þar sem leikið verður gegn heimamönnum í undankeppni HM.
