Sölvi á æfingu í dag.
Miðvörðurinn Sölvi Geir Ottesen er kominn aftur í íslenska landsliðshópinn en hann hefur staðið sig mjög vel í hjarta varnarinnar hjá Ural í rússnesku úrvalsdeildinni.
„Mér hefur gengið mjög vel persónulega og ég er búinn að spila sex leiki og þeir hafa gengið vel. Líkaminn er mjög góður, formið og standið í fínu lagi. Það gengur allt mjög vel," segir Sölvi.
Hann var úti í kuldanum hjá FC Kaupmannahöfn en gekk í raðir Ural sem er í fjórtánda sæti af sextán liðum rússnesku deildarinnar.
„Þetta eru nýliðar og það er alltaf erfitt fyrir nýliða að koma sér í gang í deildinni. Þetta hefur verið ströggl og mun vera það áfram það sem eftir er af tímabilinu. Við verðum bara að hafa trú á þessu."
„Þetta er mjög sterk deild, sérstaklega efstu sex liðin. Það er mjög gaman að eigast við svona sterk lið. Ég hef mjög gaman að þessu."
Sölvi er hæstánægður með að vera kominn aftur í hópinn og hlakkar til komandi leikja gegn Króatíu.
„Ég var staðráðinn í að gera allt sem ég gæti til að koma mér í hópinn fyrir þetta verkefni. Ég mun reyna allt til að vera með í þessu. Ég mun gera allt til að sanna fyrir Lars að ég eigi að vera í byrjunarliðinu en þetta verður bara að koma í ljós. Ef ég er á bekknum mun ég styðja þá sem spila í staðinn eins vel og ég get."
Viðtalið má sjá í sjónvarpinu hér að ofan.
