Gylfi Þór Sigurðsson segir að leikmenn séu vel gíraðir fyrir komandi vináttulandsleik gegn Póllandi sem verður annað kvöld í Varsjá.
„Maður veit ekki hvað Pólland ætlar að gera, hvort þeir breyti liðinu mikið, en leikvangurinn er mjög flottur þó grasið sé ekkert sérstakt. Vonandi verður þetta góður leikur," segir Gylfi.
„Þó að við verjumst mjög lengi í leikjum þá reynum við oftast að spila boltanum eins mikið með jörðinni og við getum. Það gætu komið inn nýjir leikmenn sem hafa lítið spilað með landsliðinu áður en við reynum að láta þeim líða vel og hjálpa þeim að komast sem fyrst í gírinn með liðinu."
Gengi Íslands í vináttuleikjum undanfarin ár hefur ekki verið sérstakt hvað úrslit varðar meðan vel hefur gengið í keppnisleikjum.
„Við erum að nýta vináttuleikina til að breyta liðinu og leyfa þeim að spila sem hafa minna spilað og prófa nýja hluti. Það hefur gengið mjög vel í tveimur síðustu undankeppnum en auðvitað skipta æfingaleikirnir máli, varðandi FIFA-listann og svona," segir Gylfi en viðtalið má sjá í heild sinni í sjónvarpinu hér að ofan.
