Laywin Kurzawa, vinstri bakvörður Paris Saint-Germain, verður frá út árið eftir að hafa farið í aðgerð á baki.
Kurzawa hefur átt slæmt ár sem byrjaði á því að hann missti byrjunarliðssæti sitt hjá PSG. Í kjölfarið var hann ekki valinn í landsliðshóp Frakka fyrir heimsmeistaramótið, þrátt fyrir að hafa komið reglulega við sögu í undankeppninni.
Ofan á það allt bættust bakmeiðsli við en aðgerðin gekk vel og er búist við að Kurzawa geti verið klár í slaginn í fyrsta lagi í janúar.
Bakvörðurinn þarf tvo til þrjá mánuði í endurhæfingu en það getur verið mikill munur á milli manna hversu lengi þeir eru að ná sér eftir svona aðgerðir.
Þegar Kurzawa missti byrjunarliðssætið hjá PSG í vor vakti það áhuga enskra stórliða á borð Manchester United, Chelsea og Tottenham. Wolves var einnig orðað við Kurzawa í sumar.
Athugasemdir