Eto'o skoraði 130 mörk í 199 leikjum hjá Barcelona. Hann var orðinn 32 ára gamall þegar hann hélt loks í enska boltann en hans besta tímabil þar voru 12 mörk í 35 leikjum hjá Chelsea.
Kamerúnski sóknarmaðurinn Samuel Eto'o lagði skóna á hilluna á dögunum en hann átti glæsilegan feril. Hann lék fyrir Barcelona á hátindi ferilsins.
Hann lék eitt tímabil undir stjórn Josep Guardiola hjá Barca og unnu þeir þrennuna saman. Eto'o lenti í útistöðum við Guardiola og var á endanum seldur til Inter um sumarið. Þar vann hann þrennuna annað árið í röð, í þetta sinn undir stjórn Jose Mourinho.
Guardiola var spurður út í Eto'o og hafði ekkert nema jákvæða hluti að segja þrátt fyrir rifrildi fortíðarinnar.
„Hann er einn af bestu sóknarmönnum sem ég hef séð eða þjálfað á ævi minni. Hann var algjör lykilþáttur í velgengni okkar fyrsta árið hjá Barcelona," sagði Guardiola.
„Það var mér heiður að fá að þjálfa svona góðan leikmann í eitt ár. Hann var í hæsta gæðaflokki."
Athugasemdir