26. umferð deildartímabilsins á að fara fram yfir helgina. Sex leikir verða á laugardaginn, tveir á sunnudaginn og einn á mánudaginn.

Tveir Íslendingar leika í efstu deild í Þýskalandi. Alfreð Finnbogason og félagar í Augsburg taka á móti Wolfsburg á sama tíma og Paderborn heimsækir Fortuna Düsseldorf. Samúel Kári Friðjónsson er á mála hjá Paderborn en verður ekki með vegna smávægilegra meiðsla.

Borussia Dortmund tekur á móti Schalke í stórleik helgarinnar sem fer fram á sama tíma og Íslendingaleikirnir. Eintracht Frankfurt og Borussia Mönchengladbach mætast svo í síðasta leik laugardagsins.

Á sunnudaginn á FC Köln leik við Mainz. Heimamenn verða án nokkurra leikmanna sem voru sýktir af veirunni. Union Berlin tekur svo á móti toppliði FC Bayern í seinni leik sunnudagsins.

Werder Bremen og Bayer Leverkusen eigast við í síðasta leik umferðarinnar á mánudagskvöldið.

Þá ber að nefna að Rúrik Gíslason í Sandhausen og Guðlaugur Victor Pálsson í Darmstadt mæta til leiks í B-deildinni á laugardaginn klukkan 11:00.

Laugardagur:
13:30 Dortmund - Schalke 04
13:30 RB Leipzig - Freiburg
13:30 Hoffenheim - Hertha Berlin
13:30 Dusseldorf - Paderborn
13:30 Augsburg - Wolfsburg
16:30 Frankfurt - Gladbach

Sunnudagur:
13:30 Koln - Mainz
16:00 Union Berlin - Bayern

Mánudagur:
18:30 Werder - Leverkusen