Ragnar er lykilmaður í íslenska landsliðinu.
Miðvörðurinn Ragnar Sigurðsson segir að það hafi vissulega verið pirrandi að ganga af velli eftir leikinn gegn Póllandi þar sem Ísland fékk fjögur mörk á sig í seinni hálfleik og tapaði 4-2.
„Þegar maður skoðar mörkin var þetta töluverð heppni hjá pólska liðinu og einstaklingsmistök hjá okkur. Mér finnst 4-2 ekki gefa alveg rétta mynd af leiknum þó að við vorum vissulega ekki nægilega góðir og áttum ekki skilið meira úr þessum leik," segir Ragnar.
„Þegar við lentum undir vorum við að reyna of mikið og vorum of opnir. Þetta var ekki nægilega góður leikur í heildina séð. Það er mikilvægt að læra af mistökunum."
Á þriðjudag leikur íslenska liðið gegn Slóvakíu. Hvað þarf liðið að gera betur þar?
„Við þurfum að halda skipulaginu og hvernig við viljum spila. Menn þurfa að halda stöðunum sínum. Svo eru menn að fá tækifæri sem hafa lítið eða jafnvel ekkert spilað. Það verður gott fyrir þá og gaman að sjá þá spila," segir Ragnar en talsvert er um nýliða í hópnum.
„Menn eru alltaf smá feimnir í byrjun en þetta eru hæfileikaríkir gaurar," segir Ragnar um nýliðana en viðtalið er í heild í sjónvarpinu hér að ofan.
