Eins og allir lesendur vita væntanlega þá tryggði markvörðurinn Alisson mikilvægan sigur Liverpool gegn West Brom í gær með því að skora sigurmarkið eftir að hafa farið fram í hornspyrnu í blálokin.

Í hlaðvarpsþættinum Enski boltinn ræddu Jón Kaldal og Engilbert Aron Kristjánsson um þetta magnaða atvik.

„Þetta er gjörsamlega lygilegt. Það eru svona augnablik sem gera það að verkum að maður er að horfa á fótbolta, þetta er dramatík sem er lygilegri en nokkur skáldskapur," segir Aron.

„Þetta var ævintýralega góður skalli hjá honum, setti boltann óverjandi í hornið. Þetta er eitt besta augnablik þessa tímabils og jafnvel í sögu ensku úrvalsdeildarinnar. Það átti enginn möguleika í hann," segir Jón Kaldal.

„Hann er trúaður og með miklar tilfinningar. Hann talaði um það sjálfur að hann kann ekki að fagna en félagar hans í liðinu sáu um það."

Liverpool á eftir að spila við Crystal Palace og Burnley í lokaumferðunum og getur innsiglað Meistaradeildarsæti með því að vinna þá báða leiki. „Ég hef trú á því að þeir klári þetta, sigli þessu nokkuð örugglega í höfn," segir Jón Kaldal.

Tweet

Senda a Facebook Hafdu samband Senda frétt Prenta frétt Frétta leit