Mark Parsons.
Hollenska fótboltasambandið er ekki enn búið að gefa neitt út varðandi ráðningu á nýjum landsliðsþjálfara.
Enska þjálfaranum Mark Parsons var vikið úr starfi eftir slakan árangur á EM í sumar. Holland fór inn á EM sem ríkjandi meistari en liðið virkaði ekki sannfærandi og endaði á því að detta út í átta-liða úrslitum gegn Frakklandi.
Holland verður því með nýjan þjálfara gegn Íslandi í næsta mánuði. Það er í raun hreinn úrslitaleikur um sæti á HM, en Íslandi mun líklega duga jafntefli í þeim leik til að vinna riðilinn.
Er þetta að trufla í undirbúningnum fyrir leikinn?
„Þetta er ekki draumastaðan. Ég hefði viljað að hann héldi áfram. Þær spila reyndar leik við Skotland - æfingaleik - á föstudeginum. Við sjáum hvað þær eru að fara að gera í þeim leik. Við horfum í það, hversu margar breytingar nýr þjálfari er að fara að gera," sagði Þorsteinn Halldórsson, landsliðsþjálfari, á fréttamannafundi í dag. Hann grínaðist í kjölfarið með að það væri draumurinn að Hollendingar væru bara þjálfaralausir í þessum leik sem er framundan.
Leikirnir sem eru framundan:
2. september gegn Hvíta-Rússlandi (Laugardalsvöllur)
6. september gegn Hollandi (Stadion Galgenwaard)
Athugasemdir
