Hudson-Odoi framlengir við Chelsea til 2024 (Staðfest)

Hudson-Odoi er 18 ára gamall og uppalinn hjá Chelsea, en hann var atkvæðamikill á síðustu leiktíð er hann gerði 5 mörk í 24 leikjum áður en hann meiddist illa.

Hann sleit þá hásin og hefur hann verið frá síðan en hann er þó væntanlegur á næstu dögum í aðalliðið. Hann spilaði með U23 ára liði Chelsea gegn Brighton á dögunum og hefur verið að æfa stíft með aðalliðinu.

Samningur hans við Chelsea átti að renna út næsta sumar og var mikil umræða um það hvort hann myndi fara frá félaginu en Bayern München hefur verið á höttunum eftir honum síðasta árið.

Leikmaðurinn ákvað þó í sumar að hefja viðræður við Chelsea og fékkst það staðfest í dag að hann væri búinn að framlengja til ársins 2024. Hann mun þá þéna 120 þúsund pund á viku.