Valur fékk FH í heimsókn í síðasta leik dagisns í Bestu deildinni.

Sigurður Bjartur Hallsson kom FH-ingum yfir snemma leiks. Hann bætti öðru markinu við stuttu síðar eftir sendingu frá Tómasi Orra Róbertssyni.

Valsmenn voru ekki mjög vankaðir eftir þetta því Adam Ægir Pálsson minnkaði muninn þegar hann skoraði með skoti sem fór af Arngrími Bjarti Guðmundssyni í slána og inn.

Valur fékk síðan vítaspyrnu þegar skammt var til loka fyrri hálfleiks þegar Grétar Snær Gunnarsson reif Hólmar Örn Eyjólfsson niður í teignum.

Sigurður Egill Lárusson, leikjahæsti leikmaður Vals frá upphafi, tilkynnti á dögunum að hann muni yfirgefa félagið eftir tímabilið. Hann steig á punktinn og skoraði og jafnaði metin fyrir Valsmenn.

Í blálok fyrri hálfleiks skoraði Tryggvi Hrafn Haraldsson og kom Val yfir eftir sendingu frá Sigurði Agli.

Eftir klukkutíma leik átti Baldur Kári Helgason skot sem fór af vörn Vals og boltinn barst til Ísaks Óla Ólafssonar sem skallaði boltann í netið og jafnaði metin.

Valsmenn voru nálægt því að endurheimta forystuna undir lok leiksins þegar Albin Skoglund átti skalla eftir fyrirgjöf frá Sigurði Agli en boltinn fór yfir markið.

Stuttu síðar náðu Valsmenn forystunni. Lúkas Logi Heimisson kom sér í stöðu fyrir utan teiginn og skoraði með skoti í nærhornið. Forystan stóð ekki lengi þar sem Sigurður Bjartur jafnaði metin fyrir FH strax í næstu sókn þegar hann skallaði boltann í netið eftir fyrirgjöf frá Kjartani Kára Halldórssyni, hann fullkomnaði þar með þrennuna.

Bjarni Guðjón Brynjólfsson átti síðustu tilraun leiksins en boltinn fór framhjá markinu og jafntefli því niðurstaðan.

Valur er í 2. sæti með 45 stig, fjórum stigum á undan Stjörnunni sem á leik til góða gegn Fram á morgun. FH er í 5. sæti með 33 stig, stigi á undan Fram.