Viljum hvergi sjá fordóma
Guðni Bergsson formaður KSÍ segir það engum blöðum um það að flétta að þessi ummæli Þórarins væru auðvitað forkastanleg enda hafi hann fengið rautt spjald í kjölfarið.

„Þetta er auðvitað eitthvað sem við viljum ekki heyra hvorki innan né utan leikvallar, það er alveg ljóst. Enda bað Þórarinn, leikmanninn afsökunar eftir leik og opinberlega á samfélagsmiðlum."

„Þetta gefur okkur kannski tækifæri til að vekja athygli á þessum málum almennt og læra af þessu. Auðvitað viljum við hvergi sjá fordóma eða mismunun á neinu tagi hvorki innan okkar hreyfingar né í okkar samfélagi."

Aga- og úrskurðarnefnd fer eftir þeim gögnum sem liggja fyrir
Margir hafa undrast á því að Þórarinn Ingi hafi ekki fengið lengra bann fyrir þau orð sem hann lét falla í garð Ingólfs sem steig fram í fjölmiðlum fyrir nokkrum árum og lýsti þar veikindum sínum.

„Aga- og úrskurðarnefnd verður að fara eftir þeim gögnum sem liggja fyrir hverju sinni um þau atvik sem verða í leik eins og í þessu tilfelli. Þeir dæma eftir því og ef það er engin útlistun á ummælunum sem var í þessu tilfelli þá er eins og í þessu tilviki eins leiks bann látið nægja," sagði Guðni en var þá skýrsla dómara ekki nægilega vel útfyllt og með nægilega miklar skýringar fyrir aga- og úrskurðarnefndina?

„Mér skylst að svo hafi verið," svaraði Guðni.

Er það ekki áhyggjuefni og eithvað sem þyrfti að skoða í framhaldinu?

„Það er eins og allt annað mannanaverk. Það má draga lærdóm af því og það verður að liggja alveg ljóst fyrir í huga dómara hvað viðkomandi sagði. Dómarinn tilkynnir ummælin svo er það aga- og úrskurðarnefnd sem að metur hvort að ummælin eiga undir ákvæði 16. grein reglugerðar um aga- og úrskurðarmál."

Formaður KSÍ vonar að allir dragi lærdóm af þessu.

„Þetta sýnir að það þarf að vanda sig í samskiptum og ekki láta skapið hlaupa með sig í gönur eða sýna fordóma á einhverju tagi. Þórarinn hefur beðist afsökunar og áttað sig á sínum gjörðum."

„Ef þetta opnar á frekari umræðu um andlega líðan í knattspyrnuheiminum og almennt í okkar samfélagi þá er það til bóta enda höfum við verið í sambandi við Geðhjálp og höfum rætt málin í kjölfarið á þessum atburði. Við erum að reyna finna leið til þess að láta þetta leiða af sér eitthvað gott og vonandi getum við gert eitthvað saman í þeim efnum á næstunni," sagði Guðni Bergsson formaður KSÍ að lokum í samtali við Fótbolta.net.