Ítalski knattpyrnuþjálfarinn Antonio Conte segir að lærisveinar hans hjá Inter verði að fylgja fordæmi enska úrvalsdeildarfélagsins Liverpool og leggja harðar að sér.
Conte hefur gert frábæra hluti með Inter-liðið frá því hann tók við keflinu á síðasta ári en hann kom liðinu í úrslitaleik Evrópudeildarinnar og hefur þá barist við Juventus um titilinn á Ítalíu.
Liðið hefur ekki unnið í síðustu þremur leikjum í Seríu A en Conte vonast til að leikmenn hans fari að fordæmi Liverpool sem hefur stöðugt bætt sig á milli ára. Liverpool vann Meistaradeildina á síðasta ári og tók þá ensku úrvalsdeildina á síðustu leiktíð auk þess sem liðið vann Ofurbikar Evrópu og HM félagsliða.
„Við verðum alltaf að gefa 110 prósent í að ná í góð úrslit og ofan á það spila vel. Við verðum að leggja hart að okkur. Tökum Jürgen Klopp og Liverpool sem dæmi. Þetta lið var ekki að vinna neitt í þessi fjögur ár og núna er þetta stríðsvél," sagði Conte.
„Við erum að byggja eitthvað mikilvægt hérna og ég veit ekki hvort það mun skila sér í titlum á stuttum tíma en ég veit að við erum á réttri leið. Maður sér það út á við að það er kominn góður strúktúr á liðið ólíkt síðustu árum og það gerir mig ánægðan," sagði hann ennfremur.
Athugasemdir