Ríkjandi heimsmeistarar Argentínu eru líklegir til sigurs
Fótboltinn mun líklega ekki snúa aftur 'heim' að sögn enska sparkspekingsins Jamie Carragher, en hann hefur nefnt þær þrjár þjóðir sem eru líklegastar til að vinna HM á næsta ári.
Englendingar hafa náð frábærum árangri síðustu ár og komst meðal annars tvisvar í röð í úrslit Evrópumótsins og í undanúrslit HM 2018 undir stjórn Gareth Southgate.
Thomas Tuchel stýrir liðinu á HM á næsta ári, en Carragher telur að þrátt fyrir frábæran árangur síðustu ára þá sé enska liðið ekki líklegt til að fagna sigri á næsta ári.
Carragher nefnir þrjár þjóðir sem eru líklegastar en England er í flokknum fyrir neðan.
„Maður verður að horfa til ríkjandi meistara Argentínu. Verður þetta í síðasta sinn sem Messi spilar fótbolta? Þeir munu örugglega fá mikinn stuðning, sérstaklega ef þeir spila í Miami og bara þau áhrif sem hann hefur haft á MLS-deildina með Inter Miami.“
„Ef við horfum á Evrópu þá eru það Evrópumeistarar Spánverja með Lamine Yamal og svo Frakkland með Kylian Mbappe, sem eru tveir bestu leikmenn heims í augnablikinu ásamt auðvitað Ousmane Dembele.“
„Mér finnst mjög erfitt að horfa á mót og ekki nefna Frakkland. England kemur síðan í næsta flokki fyrir neðan ásamt Portúgal. Liðin sem ég nefndi áður eru líklegust, en England og Portúgal eiga örlítinn séns,“ sagði Carragher.
Athugasemdir
