Branca starfaði fyrir Inter frá 2002 til 2014 og var maðurinn á bakvið kaupin á Diego Milito, Wesley Sneijder og Samuel Eto'o á sínum tíma.

Hann reyndi að fá Messi til Inter árið 2008 en það gekk þó ekki eftir. Messi var þá að klára fjórða tímabilið sitt með Börsungum en hann vildi ekki yfirgefa félagið.

„Við reyndum að fá hann en Leo vildi ekki fara frá Barcelona. Hann stóð í þakkarskuld við Barcelona og peningarnir eru ekki alltaf í fyrsta sæti, " sagði Branca.

Massimo Moratti, fyrrum forseti Inter, segir einnig að félagið hafi reynt að fá Messi en að það sé nokkuð öruggt að hann eigi aldrei eftir að semja við annað félag.

„Það er draumur allra að fá hann en hann mun ekki fara frá Barcelona. Hann er samt besti leikmaður heims," sagði Moratti.