Spænska landsliðskonan Jenni Hermoso mun ekki leika með á Evrópumótinu í sumar.
Þetta er mikið áfall fyrir Spánverja þar sem Hermoso er magnaður leikmaður sem hefur spilað stórt hlutverk í stórkostlegum árangri Barcelona síðustu ár.
Hermoso fór sérstaklega á kostum árið 2021 - á ári þar sem Barcelona vann allt sem hægt var að vinna - og skoraði hún 51 mark í öllum keppnum; meira en nokkur önnur fótboltakona.
Hún er jafnframt markahæsti leikmaðurinn í sögu spænska landsliðsins með 45 mörk í 91 leik.
Hermoso varð fyrir hnémeiðslum í aðdraganda mótsins og getur ekki tekið þátt. Er það eins og áður segir mikið áfall fyrir Spánverja sem þykja líklegar til afreka á mótinu í næsta mánuði.
Spánn er í riðli með Danmörku, Finnlandi og Þýskalandi, en farið var yfir þann sterka riðil á Heimavellinum í vikunni. Hlusta má á þáttinn í heild sinni hér fyrir neðan.
Athugasemdir