Putellas, sem er 27 ára gömul, er fyrirliði Barcelona en hún vann þrennuna með liðinu á síðustu leiktíð.

Barcelona vann deildina, Meistaradeildina og spænska bikarinn og átti Putellas magnað tímabil og skoraði 26 mörk í 42 leikjum.

Hún var einnig valin leikmaður ársins af UEFA en Putellas hafði betur gegn Samantha Kerr hjá Chelsea og liðsfélaga sínum, Jennifer Hermoso.

Putellas er þriðja konan sem vinnur þessi verðlaun. Ada Hegerberg vann fyrst árið 2018 og þá vann Megan Rapinoe árið 2019 fyrir árangur hennar með bandaríska landsliðinu.