Björn Bergmann færir sig ekki um set í dag. Hér er hann á æfingu Íslands í morgun.
Björn Bergmann Sigurðarson, sóknarmaður íslenska landsliðsins, hefur verið frábær með Molde í Noregi á þessu tímabili. Þjálfari hans, Ole Gunnar Solskjær, hefur sagt að Björn sé besti leikmaður deildarinnar.
„Þetta er búið að vera rosalega gaman, ég spila alla leiki og mér hefur tekist að skora nokkur mörk. Við erum í fjórða sæti núna en það er mikið eftir og vonandi náum við öðru sætinu," segir Björn en Fótbolti.net ræddi við hann í Helsinki í dag.
Frammistaða hans hefur vakið athygli stærri félaga og voru einhverjar hræringar í hans málum í gær. Björn segir að nú sé hinsvegar ljóst að hann sé ekki á förum frá Molde í þessum glugga.
„Einbeitingin er á leikinn gegn Finnum. Það var eitthvað í gangi í gær en það var slökkt í því svo ég verð áfram hjá Molde. Glugginn í Noregi er lokaður svo Solskjær gæti ekki keypt sér nýjan leikmann í staðinn fyrir mig. Hann þarf að ná einu af þremur efstu sætunum og kannski vinna bikarinn, ég skil hann mjög vel að vilja ekki missa leikmann núna," segir Björn sem er sáttur við að klára tímabilið með Molde.
„Mér líður mjög vel hjá Molde, mér hefur gengið vel þarna og vonandi gengur eins vel það sem eftir er af tímabilinu."
Viðtalið við Björn má sjá í heild í sjónvarpinu hér að ofan en þar tjáir hann sig meðal annars um landsleikinn gegn Finnlandi sem verður á laugardaginn og hversu ánægður hann sé með að fá frí frá gervigrasinu í Noregi.
