,,Þetta er frekar sárt. Við bárum of mikla virðingu fyrir þeim fyrstu tuttugu mínúturnar eða hálftímann og það var það sem eyðilagði kannski fyrir okkur í þessum leik. Mér fannst mínir menn standa sig mjög vel í þessum leik," sagði Sigurður Helgason þjálfari Gróttu við Fótbolta.net eftir 2-1 tap gegn meisturum ÍA í fyrstu deildinni í dag.
Grótta er eftir leikinn í tíunda sæti deildarinnar, þremur stigum á undan Leikni R. þegar tvær umferðir eru eftir.
Þessi lið mætast um næstu helgi og þar mun vanta leikmenn í lið Gróttu vegna leikbanns.
,,Auðvitað er þetta svolítill úrslitaleikur þannig lagað og við verðum að standa okkur í þeim leik. Það koma einhverjir nýir spilar í staðinn fyrir þessa sem eru að fara í leikbann og þeir munu standa sig, ég veit það."
,,Þeir eru með stórt hjarta þessir Gróttustrákar eins og þeir sýndu það hérna í dag."
,,Þeir eru að spila á móti efsta liðinu Skaganum sem er ekkert smálið á íslenskan mælikvarða. Þeir eru að spila á einum erfiðasta útivelli landsins og voru nærri því að ná jafntefli."
Hér að ofan má sjá viðtalið í heild sinni.
